Ахвярамi зладзеяў станавiлiся гаспадары шыкоўных сталiчных кватэр, якiя здавалi жыллё на суткi
У Мiнску супрацоўнiкi крымiнальнага вышуку Савецкага РУУС ноччу затрымалi крымiнальнае «трыо», удзельнiкi якога спецыялiзавалiся, як мяркуецца, на крадзяжах мэблi, сантэхнiкi i iншага дабра.
Як паведамiлi карэспандэнту «Звязды» ў аддзеле iнфармацыi i грамадскiх сувязяў ГУУС Мiнгарвыканкама, у сталiцы было зарэгiстравана некалькi фактаў, калi невядомыя ў розных раёнах горада здымалi на суткi жыллё, а ранiцай прадпрымальныя гаспадары, завiтаўшы дадому, натыкалiся лiтаральна на пустыя сцены. Часам «сутачнiкi» не грэбавалi нават зрываць плiнтусы ў кватэрах, бывала, што выкручвалi i лямпачкi. У адной з кватэр на праспекце Незалежнасцi пасля вiзiту зладзеяў знiкла джакузi. А выйшлi на злачынцаў праваахоўнiкi ў ходзе аператыўна-пошукавых мерапрыемстваў: у мiлiцыю паступiла iнфармацыя аб тым, што на вулiцы Куйбышава трое падазроных асобаў знялi кватэру. Узялi прайдзiсветаў «цёпленькiмi», якраз калi яны пакавалi рэчы. Затрыманыя аказалiся жыхарамi Вiцебскай, Гродзенскай i Маскоўскай абласцей. Зараз устанаўлiваецца, цi маюць злачынцы дачыненне да 6 аналагiчных крымiнальных эпiзодаў.
Iгар ГРЫШЫН
Звязда 25 мая 2007