Увесцi абавязковае дэклараванне даходаў, якiя накiроўваюцца на будаўнiцтва жылля, пакуль не плануецца
Па чутках i аўтарытэтна
Днямi ў пэўных выданнях прайшла пагалоска аб тым, што нiбыта рыхтуецца нейкi дакумент аб магчымым абавязковым дэклараваннi асабістых даходаў, якiя накiроўваюцца на будаўнiцтва i набыццё жылля.
Пракаментаваць гэту iнфармацыю згадзiлiся пастаянныя эксперты "Звязды" старшыня Беларускай асацыяцыi "Нерухомасць" Мiкалай Прасталупаў i начальнiк галоўнага ўпраўлення падаткаабкладання фiзiчных асобаў Мiнiстэрства па падатках i зборах Беларусi Галiна Радзюкевiч.
— Заклiкi з падобнай iнiцыятывай сапраўды iснуюць з боку сталiчных функцыянераў, якiя разлiчваюць такiм чынам паскорыць адкат цэнаў на другасную нерухомасць Мiнска, — патлумачыў навiну Мiкалай Прасталупаў. — З другога боку, уявiце, хто будзе дэклараваць, што ў яго ёсць 100 тысяч долараў для набыцця двухпакаёвай кватэры? Калi гэта адбудзецца, то ў дакументах пры ажыццяўленнi здзелак будзе адна сума, а непасрэдна прадаўцу будзе выплачвацца ўжо зусiм iншая. Такiмi адмiнiстрацыйнымi метадамi магчыма толькi часова "замарозiць" высокiя цэны на жыллёвую нерухомасць, а кардынальна вырашаць праблему трэба iншымi эканамiчнымi шляхамi. Падобныя абмежавальныя схемы ўжо iснавалi раней, аднак пакупнiкi i прадаўцы ўсё роўна адшуквалi шляхi ўзаемаразлiкаў з захаваннем сваiх iнтарэсаў. Спадзяюся, што дзяржава не пойдзе на такi эксперымент, каб зноў заганяць людзей у "шэрыя" схемы.
— Магчыма, падобнае новаўвядзенне было б мэтазгодна зрабiць, бо сапраўды ў сферы будаўнiцтва жылля цяпер абарочваюцца даволi аб’ёмныя фiнансавыя сродкi, крынiцы якiх не заўсёды цалкам празрыстыя. У нас i сёння iснуе механiзм адраснага кантролю, калi ў грамадзян могуць запатрабаваць маёмасную дэкларацыю, каб высветлiць адпаведнасць расходаў з рэальнымi даходамi, — паведамiла рэдакцыi Галiна Радзюкевiч. — Разам з тым зазначу, што пакуль у гэтым накiрунку намi нiчога новага не распрацоўваецца. Больш таго, нават у планах на змяненне падатковага заканадаўства на наступны год абавязковае дэклараванне даходаў, якiя накiроўваюцца ў сферу будаўнiцтва жылля, не прадугледжана.
Сяргей КУРКАЧ.
Звязда
16 ноября 2007